Azam imekuwa tamu mno

MIEZI kadhaa iliyopita wakati ikishiriki Ligi Kuu Bara, Azam iliyokuwa mabingwa watetezi ilikuwa ikionekana kuwa ‘kimeo’. Soka lake lilikuwa halivutii na wachezaji walikuwa wakicheza bila malengo.

Ndiyo maana haikuwa ajabu kuishuhudia timu hiyo ikipoteza taji lake kwa Yanga, baada ya kuanza msimu kichovu na kuja kuzinduka mwishoni baada ya kupelekwapelekwa na Simba ambao walionekana kuipania kuitwaa nafasi ya pili.

Hata hivyo kwa sasa Azam inaonekana kuwa ya tofauti siku chache tu baada ya kukabidhiwa mikononi mwa Kocha Stewart Hall kutoka Uingereza.

Kocha huyo anaifundisha Azam kwa mara ya tatu sasa baada ya kuwahi kufanya hivyo miaka ya nyuma. Kipindi chote ambacho Hall amekuwa na Azam imeonekana kuwa ya tofauti na kucheza kandanda safi na la kuvutia.

Kocha huyo aliiwezesha Azam kutwaa mataji mawili ya Kombe la Mapinduzi na kufika katika hatua ya mtoano ya Kombe la Shirikisho Afrika mwaka 2012. Wakati anaondoka Azam msimu wa 2013/14 aliiacha timu hiyo ikishika nafasi ya pili kwenye Ligi ambapo pia ilikuwa imecheza michezo 13 bila kupoteza.

Stewart mara baada ya kukabidhiwa timu amefanya mabadiliko kidogo katika benchi lake la ufundi ambapo aliwaomba mabosi wa timu hiyo kuleta watumishi kadhaa kutoka Uingereza.

Ukiachana na mabadiliko ya nje ya uwanja, ndani ya uwanja Stewart amefanikiwa kufanya mabadiliko kadha wa kadha ndani ya muda mfupi tu na huenda akafanya mengine makubwa kwa siku zijazo.

Mfumo

Msimu uliopita Azam ikiwa na makocha Joseph Omog na baadaye George ‘Best’ Nsimbe ilikuwa ikitumia mfumo wa 4-2-3-1 na 4-4-2, lakini mara baada ya Stewart kupewa timu hiyo ameanza na mfumo wa 3-5-2 ambao unaonekana kuzaa matunda. Timu hiyo ikitumia mfumo huo imeshinda mechi zake zote tatu za hatua ya makundi katika michuano ya Kombe la Kagame inayoendelea ikiwa pia haijafungwa bao hata moja.

Katika mfumo wake, Mzungu huyo anawatumia mabeki watatu nyuma ambao ni Aggrey Morris, Sergie Wawa na Erasto Nyoni na kuwatumia wachezaji watano katikati.

Mfumo huo umeiwezesha Azam kuwa imara katika eneo la kati ambapo hucheza viungo watatu na pia katika mashambulizi ya kupitia pembeni ambapo mabeki wa pembeni Shomary Kapombe na Gadiel Michael wamekuwa wakipiga mipira ya krosi ya kutosha.

Hata hivyo mfumo huu una changamoto zake na utapata kipimo kizuri pale timu hiyo itakapokutana na timu zinazotumia mashambulizi ya pembeni zaidi.