MILINDIMO YA PWANI.COM

   IGP Mangu apangua makamanda polisi

          

                       Mkuu wa Jeshi la Polisi nchini, IGP Ernest Mangu.

Dar es Salaam. Mkuu wa Jeshi la Polisi nchini, IGP Ernest Mangu amefanya mabadiliko ya baadhi ya makamanda wa mikoa, wakuu wa upelelezi wa mikoa, wakuu wa usalama barabarani wa mikoa pamoja na watendaji wengine wa vikosi na vitengo mbalimbali ndani ya jeshi hilo.

Mmoja wa waliokumbwa na mabadiliko hayo ni Kamanda wa Polisi Mkoa wa Tabora, Kamishna Msaidizi (ACP) Peter Ouma ambaye amepelekwa Makao Makuu ya Polisi, nafasi yake kuchukuliwa na aliyekuwa Ofisa Mnadhimu Mkoa wa Dodoma, (ACP) Suzan Kaganda.

Ouma amehamishwa zikiwa zimepita siku 10 tangu magari 1,000 kukwama kwenye Barabara Kuu ya Mwanza kwenda Dar es Salaam katika Kijiji cha Ngonho, Kata ya Miguwa, wilayani Nzega mkoani humo, kutokana na utekaji wa malori.

Katika tukio hilo, madereva waligoma kuondoa magari kutokana na kuchukizwa na kitendo cha polisi wa eneo hilo kushindwa kupambana na ujambazi, na ilibidi Ouma afanye kazi ya ziada kuwabembeleza.

Taarifa iliyotolewa na Msemaji wa Polisi jana, Advera Senso ilieleza kuwa mabadiliko hayo ni ya kawaida na lengo lake ni kuhakikisha wananchi wanaendelea kupata huduma bora ya usalama.

Makamanda wa mikoa

Taarifa ilieleza kuwa aliyekuwa Kamanda wa Polisi Mkoa wa Ruvuma (RPC), SACP Deusdedit Nsimeki amehamishiwa mkoani Manyara, ambako aliyekuwa Kamanda wa Polisi wa mkoa huo, ACP Akili Mpwapwa amekuwa RPC mkoani Ruvuma.

Mwingine ni aliyekuwa Ofisa Mnadhimu Mkoa wa Lindi, (ACP) Renatha Mzinga ambaye amekuwa Kamanda wa Polisi Mkoa wa Lindi.

Idara ya Upelelezi

Aliyekuwa Mkuu wa Upelelezi Mkoa wa Mtwara, ACP Eliyakimu Masenga amepelekwa kuwa Mkuu wa Upelelezi Kikosi cha Tazara kushika nafasi ya SP Isack Msengi anayekuwa Kaimu Mkuu wa Upelelezi Mkoa wa Pwani.

“Aliyekuwa Mkuu wa Upelelezi Mkoa wa Tabora, ACP David Mnyambuga anakuwa Mkuu wa Upelelezi wa Mkoa wa Ilala kushika nafasi ya ACP Juma Bwire anayekuwa Ofisa Mnadhimu Mkoa wa Tabora,” inaeleza taarifa hiyo.

Taarifa hiyo ilieleza kuwa aliyekuwa Ofisa Mnadhimu Mkoa wa Tabora, (SSP) John Kauga anakuwa Mkuu wa Upelelezi mkoani humo wakati aliyekuwa Mkuu wa Polisi Wilaya ya Rombo, SSP Ralph Meela anakuwa Mkuu wa Upelelezi Mkoa wa Mtwara.